Yangiliklar

Hurmatli yurtdoshlar, qadrli kinoijodkorlar! 

Kinematografiya agentligi jamoasi Sizlarni O‘zbek tiliga davlat tili maqomi berilganining 36 yilligi hamda “21-oktabr – O‘zbek tili bayrami kuni” bilan samimiy qutlaydi. 

Biz kinoijodkorlar yaratayotgan har bir filmlarimiz orqali o‘z ona tilimiz – O‘zbek tilini yanada rivojlantirishga, uning mavqeyini oshirishga xizmat qilishimiz lozim. Quvonch bilan aytish kerakki, bu boradagi amaliy ishlar hammamizning birdamligimiz asosida amalga oshmoqda. Xususan, muhtaram Prezidentimiz tashabbusi bilan yaratilayotgan “Tirik tarix” dasturi doirasidagi badiiy, badiiy-publitsistik filmlar ona tilimizning boyligi, o‘ziga xos jozibasini namoyish etishga xizmat qilmoqda. O‘tgan davr mobaynida yaratilgan “Bahodir Yalangto‘sh”, “Ajiniyoz”, “Maxtumquli”, “Ulug‘ Amir va donna Mariya” kabi tarixiy filmlar fikrimizning yorqin misolidir. 

🎬Ayni paytda suratga olish jarayoni qizg‘in olib borilayotgan 
“Yulduzlar shu’lasi: Jomiy va Navoiy” tarixiy badiiy filmi orqali esa ulug‘ mutafakkir va buyuk shoir, turkiy tilda “ko‘p va xo‘b” she’rlar yozgan hazrat Alisher Navoiyning siymosini aks ettirib, ona tilimizga bo‘lgan muhabbatni yana bir bor tarannum etishga urinmoqdamiz. 

Shunday ekan, yaratilajak har bir asar, jumladan kinoloyiha orqali milliy tilimizni ulug‘laylik va e’zozlaylik. Zero, ona tiliga bo‘lgan munosabat - ona yurtga bo‘lgan munosabat bilan tengdir. 

🇺🇿Har bir xalqning ona tili millatining ruhi, davlatining timsoli ekanini e’tiborga olgan holda, uni asrash va rivojlantirish har bir millatdoshimizning ham burchidir. Binobarin, o‘zbek tilini rivojlantirish, davlat tili sifatidagi o‘rnini va nufuzini yanada mustahkamlashdek mas’uliyatli vazifa barchamizning oldimizda eng muhim hayotiy masaladir.

Atoqli adib, jadidchilik harakatining yetuk vakili Abdulla Qodiriy ona tilimiz borasida kuyunib: “O‘zbek tili kambag‘al til emas, balki o‘zbek tilini kambag‘al deguvchilarning o‘zi kambag‘al. Ular o‘z nodonliklarini o‘zbek tiliga to‘nkamasinlar” degan edi. 

🇺🇿Muhtaram Prezidentimizning "Ona tilimiz – milliy ma’naviyatimizning bitmas-tuganmas bulog‘idir. Shunday ekan, unga munosib hurmat va ehtirom ko‘rsatish barchamizning nafaqat vazifamiz, balki muqaddas insoniy burchimizdir", — degan fikrlari tilimizni e’zozlash, uning davlat tili  sifatidagi maqomini yuksaltirish, yosh avlodni ona tiliga hurmat ruhida tarbiyalash borasida har birimizga jiddiy mas’uliyat yuklaydi. Zero, til bor ekan, millat barhayotdir.
Ona tili yashasa, millat yashaydi. Agar biz tilimizning ko‘rkamligi, boyligini milliy filmlarimiz orqali dunyoga tarannum etsak, millatimiz sha’nini yanada yuksaltirgan bo‘lamiz.

🇺🇿O‘zbek tili bayrami muborak bo‘lsin, aziz hamkasblar, qadrli yurtdoshlar!