Yangiliklar

Bugun, 2025 yil 4 iyun kuni “Renessans” kino uyida O‘zbekiston Respublikasi Madaniyat vazirligi huzuridagi Kinematografiya agentligi hamda huquqni muhofaza qiluvchi organlar bilan hamkorlikda yig‘ilish bo‘lib o‘tdi.

O‘zbekiston Respublikasi Prezidentining 2024-yil 12-dekabrdagi F-62-son farmoyishi hamda Respublika komissiyasining 2025-yil 12-maydagi 41-son bayonida belgilangan topshiriqlar ijrosini ta’minlash maqsadida o‘tkazilgan yig‘ilishda, mustaqillik yillarida mamlakatimiz tinchligi va osoyishtaligi yo‘lida qurbon bo‘lgan 196 nafar qahramonning hayot yo‘li va jasorati aks etgan filmlar hamda ijtimoiy roliklar ishlab chiqish va ularni aholiga namoyish etish masalasi muhokama qilindi.

Yig‘ilishda Kinematografiya agentligi direktori Shuhrat Rizayev, O‘zbekiston Respublikasi Yozuvchilar ijodiy uyushmasi raisi Sirojiddin Sayyid, O‘zbekiston Respublikasi Madaniyat va Ma’rifat markazi direktori Otabek Xasanov, shuningdek, O‘zbekiston Milliy gvardiyasi, Favqulodda vaziyatlar vazirligi va Mudofaa vazirligi kabi huquqni muhofaza qiluvchi organlar vakillari ishtirok etdilar. 

Yig‘ilish davomida videoroliklar yaratish bo‘yicha kelishuvga erishildi hamda ularni tayyorlash, aholiga yetkazish ishlari uchun ishchi guruh tashkil etildi.

Ushbu loyiha – fidokor qahramonlarimiz xotirasini abadiylashtirish, ularning jasoratini keng jamoatchilikka yetkazish, ayniqsa yosh avlodni vatanparvarlik ruhida tarbiyalashga qaratilgan muhim qadamdir.

📆 Bugun “Renessans” kino uyida Kinematografiya agentligi markaziy apparatining navbatdagi yig‘ilishi bo‘lib o‘tdi. Unda Agentlik rahbariyati, boshqarma va bo‘lim boshliqlari, tizim tashkilotlari rahbarlari ishtirok etdilar.

Yig‘ilish kun tartibidan quyidagi asosiy masalalar o‘rin oldi:

1️⃣Prezident hujjatlarida belgilangan iyun oyidagi topshiriqlar ijrosi, shuningdek, Agentlik hujjatlarida nazarda tutilgan vazifalarning amalga oshirilish holati muhokama qilindi. Har bir yo‘nalish bo‘yicha mas’ullarning hisobotlari tinglandi.

2️⃣2025-yilga mo‘ljallangan byudjet xarajatlarining maqsadli indikatorlari bo‘yicha amalga oshirilayotgan ishlar tahlil qilindi. Mavjud muammolar va ularni bartaraf etish yo‘llari muhokama qilindi.

3️⃣Kinostudiyalar tomonidan suratga olingan badiiy va hujjatli filmlarning kino fondga topshirilishi bo‘yicha holat ko‘rib chiqildi. Film ishlab chiqaruvchi tashkilotlarga bu boradagi intizomni mustahkamlash yuzasidan tavsiyalar berildi.

4️⃣2025-yilda amalga oshiriladigan yangi kinoloyihalar yuzasidan Badiiy kengash yig‘ilishlarini tashkil etish bo‘yicha rejalar taqdim etildi. Kun tartibiga kiritilishi kutilayotgan mavzular va loyihalar muhokama qilindi.

5️⃣O‘zbekiston Respublikasi Bosh prokuraturasining 2025-yil 29-apreldagi taqdimnomasi asosida o‘tkazilgan kengaytirilgan yig‘ilish bayoni va unga muvofiq tasdiqlangan chora-tadbirlar ijrosi yuzasidan mas’ul rahbarlarning axboroti tinglandi.

6️⃣Kun tartibidan tashqari boshqa dolzarb masalalar ham ko‘rib chiqilib, tegishli qarorlar qabul qilindi.

Yig‘ilish yakunida ijro intizomini mustahkamlash, topshiriqlarni belgilangan muddatlarda sifatli bajarish va tizim tashkilotlari o‘rtasidagi hamkorlikni kuchaytirish yuzasidan alohida ko‘rsatmalar berildi.

Avval xabar berganimizdek, joriy yilning 29-31-may kunlari “O‘zbekistonda Rossiya kinosi festivali” bo‘lib o‘tadi. O‘zbekiston Respublikasi Madaniyat vazirligi huzuridagi Kinematografiya agentligi hamda Rossiya Federatsiyasi Madaniyat vazirligi hamkorligida tashkil etilgan ushbu kinonamoyishlar “Rossiya madaniyati kunlari” dasturining bir qismi hisoblanadi.

Bugun Oʻzbekiston Milliy kino sanʼati saroyida “O‘zbekistonda Rossiya kinosi festivali”ning ochilish marosimi boʻlib oʻtdi. Tadbirda Rossiya Federatsiyasining madaniyat vaziri Olga Lyubimova hamda O‘zbekiston Respublikasi Madaniyat vazirligi huzuridagi Kinematografiya agentligi direktori Shuhrat Rizayev so‘zga chiqishdi. Ular ikki davlat o‘rtasidagi madaniy-gumanitar aloqalar tobora mustahkamlanib borayotganini, ayniqsa kino sohasidagi hamkorliklar yangi bosqichga ko‘tarilayotganini ta’kidladilar.

Shuningdek, tadbirda “Qon guruhi” filmida rol ijro etgan aktrisa Yekaterina Domashenko, “9 soniya” filmining ssenariy muallifi Marina Dovger, “Madaniy komediya” filmining ssenariy muallifi Danil Trotsenko, boshqa rasmiylar, keng jamoatchilik hamda Ommaviy axborot vositalari vakillari ishtirok etishdi. Ochilish marosimidan soʻng kino ixlosmandlari uchun “Qon guruhi” filmining namoyishi boʻlib oʻtdi.

Maʼlumot uchun, “Rossiya kinosi festivali” doirasida “Madaniy komediya”, “To‘ti Keshaning qaytishi”, “Fedya. Xalq futbolchisi”,  “9 soniya” hamda “Havo” filmlarining namoyishi rejalashtirilgan. Ushbu tadbir 31-may sanasiga qadar davom etadi.

Vengriya Bosh vaziri Viktor Orbanning taklifiga binoan, Oʻzbekiston Respublikasi Prezidenti Shavkat Mirziyoyev 2025-yil 19–21-may kunlari rasmiy tashrif bilan Budapesht shahrida boʻldi. Ushbu tashrif ikki davlat oʻrtasidagi siyosiy, iqtisodiy va madaniy hamkorlikni yangi bosqichga olib chiqdi.

Avval xabar berganimizdek, Oʻzbekiston Respublikasi Madaniyat vazirligi huzuridagi Kinematografiya agentligi direktori Shuhrat Rizayev boshchiligidagi delegatsiya Budapesht shahriga tashrif buyurib, Vengriya Bosh vaziri Viktor Orban ishtirokida ochilgan, Yevropadagi eng yirik kinokomplekslardan biri boʻlgan NFI (Nemzeti Filmintezet) studiyasi faoliyati bilan yaqindan tanishdi.

Shuningdek, 30-yanvardan 1-fevralgacha Budapesht shahrida ilk bor “Oʻzbek kino kunlari” boʻlib oʻtdi. Tadbir doirasida “Ilhaq”, “Faridaning ikki ming qoʻshigʻi”, “Pandemiya” va “House” kabi zamonaviy oʻzbek filmlari namoyish qilindi. Vengriya tomoshabinlari va kino sohasi vakillari ushbu filmlarni katta qiziqish va iliq munosabat bilan qarshi oldilar. “Oʻzbek kino kunlari”ni Budapeshtda har yili oʻtkazish tashabbusi ilgari surilib, mamnuniyat bilan qoʻllab-quvvatlandi.

Joriy yilning 13–24-may kunlari Fransiyada boʻlib oʻtgan 78-Kann xalqaro kinofestivali doirasida Oʻzbekiston Milliy kinematografiyani rivojlantirish markazi direktori Furqat Usmonov hamda Vengriya Milliy kino instituti (NFI) vakili, kinoproduser József Berger oʻrtasida uchrashuv boʻlib oʻtdi. Uchrashuvda Oʻzbekiston va Vengriya kinoijodkorlari hamkorligida suratga olinadigan “Herman Vamberi va Mulla Is’hoq” badiiy-publitsistik filmining sinopsisi, ssenariy kontsepsiyasi hamda adabiy ssenariysi yuzasidan atroflicha fikr almashildi va koproduksiya toʻgʻrisidagi kelishuv shartnomasi loyihasi ustida ish boshlash boʻyicha kelishuvga erishildi.

Mazkur loyihalar Oʻzbekiston va Vengriya oʻrtasidagi madaniy aloqalarni mustahkamlash, tarixiy merosni xalqaro miqyosda targʻib etish yoʻlida muhim qadam boʻladi.

 “Renessans” kino uyida taniqli yozuvchi Xayriddin Sulton qalamiga mansub “Osmoni falaklarda” nomli yangi kitobning taqdimoti bo‘lib o‘tdi. Ushbu asar o‘zbek adabiyotida deyarli yoritilmagan mavzu - uchuvchilar hayotiga bag‘ishlangan bo‘lib, o‘ziga xos yondashuv va badiiy mahorat bilan yaratilgani bilan e’tiborni tortadi.

Kitobda “samo lochinlari” deb ataluvchi fidokor kasb egalari — uchuvchilarning mardlik va matonatga boy faoliyati, favqulodda holatlardagi kechinmalari, sevgi, burch va Vatanga sadoqati dramatik uslubda tasvirlanadi. Syujetlarning keskinligi va voqealarning kutilmagan burilishlarga boyligi orqali inson ruhiyatining nozik jihatlari, qahramonlarning ma’naviy jasorati va ichki kurashlari yorqin badiiy obrazlar orqali ochib beriladi.

Taqdimot o‘ziga xos, yangicha formatda tashkil etildi. Teatrlashtirilgan sahnalar, nasriy, she’riy va musiqiy chiqishlar hamda kinolavhalar tomoshabinlarda unutilmas taassurot qoldirdi.

Tadbirning bosh g‘oyasi sifatida buyuk adib Abdulla Qodiriyning: 

“Modomiki, biz yangi davrga oyoq qo‘ydik, bas, biz har bir yo‘sunda ham shu yangi davrning yangiliklari ketidan ergashamiz va yangarishg‘a o‘zimizda majburiyat his etamiz”, 

degan so‘zlari tanlangan bo‘lib, bu marosimga chuqur ramziy ma’no bag‘ishladi.

Taqdimot O‘zbekiston Yozuvchilar uyushmasi, Madaniyat vazirligi, Kinematografiya agentligi, Ma’naviyat va ma’rifat markazi, “Uzbekistan Airways” kompaniyasi hamda Badiiy akademiya hamkorligida tashkil etildi. Kitob “Adabiyot” nashriyoti tomonidan chop etilgan.

Joriy yilning 11-21 may kunlari O‘zbekiston Milliy kino san’ati saroyida O‘zbekiston Respublikasi Madaniyat vazirligi huzuridagi Kinematografiya agentligi tashabbusi bilan Agentlik tomonidan 2024-yilda ishlab chiqarilgan eng sara o‘zbek filmlarining bepul namoyishlari tashkil etilmoqda.

Namoyish jadvali bilan telegramdagi rasmiy sahifamizda tanishing 

Avval xabar berganimizdek, O‘zbekiston Respublikasi Prezidentining 2025-yil 6-martdagi PQ-93-sonli *Sirdaryo viloyatida ishbilarmonlik muhiti, infratuzilma va aholi turmush darajasini yanada yaxshilash to‘g‘risida”*gi qarori asosida ishlab chiqilgan “Yo‘l xaritasi”da Guliston shahrida zamonaviy va ixcham kinoteatr tashkil etish, shuningdek, yoshlar uchun filmlar namoyish etish bo‘yicha aniq vazifalar belgilangan edi.

Kuni kecha Sirdaryo viloyati Guliston shahri Do‘stlik madaniyat uyi faollar zalida Sirdaryo viloyati Yoshlar ishlari boshqarmasining bir guruh faol yoshlari ishtirokida uchrashuv tashkil etildi.

Tadbirda Kinematografiya agentligi direktori Shuhrat Rizayev hamda Sirdaryo viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari Shohrux Isakulov ishtirok etishdi.

Uchrashuv yakunida Kinematografiya agentligi buyurtmasiga binoan Sog‘liqni saqlash vazirligi bilan hamkorlikda suratga olingan "Pandemiya" badiiy filmining namoyishi bo‘lib o‘tdi.

Kartinada 2020-yilda mamlakatdagi pandemiya davri qiyinchiliklari, Covid-19 virusi bilan kurashda shifokorlarimizning matonati haqida hikoya qilinadi.

O‘zbekiston Respublikasi Prezidentining “Kinematografiya sohasini yanada rivojlantirish hamda mamlakatimiz tarixiga bag‘ishlangan filmlar turkumini yaratishga doir chora-tadbirlar to‘g‘risida”gi PQ-209-sonli qarori, Kinematografiyani rivojlantirish va qo‘llab-quvvatlash bo‘yicha Milliy komissiya hamda Filmlarning g‘oyaviy-badiiy saviyasini oshirishga ko‘maklashuvchi Milliy kengashning qo‘shma majlisi 65/1-son bayonining “Tirik tarix” dasturiga kiritilgan filmlarni ishlab chiqarish bo‘yicha tanlov o‘tkazish tartibi to‘g‘risidagi nizomi va Milliy kengash qaroriga muvofiq “Tirik tarix” filmlar turkumi bo‘yicha kinoloyihalar tanlovi o‘tkazilib, g‘oliblar aniqlangan edi.

2025-yil 29-aprel kuni o‘tkazilgan pitchingda 24 ta studiya ishtirok etdi. Filmlarning g‘oyaviy-badiiy saviyasini oshirishga ko‘maklashuvchi Milliy kengashning 2-sonli qaroriga ko‘ra, quyidagi 6 studiya g‘olib deb topildi:

1. “Taqdir ufqlari” badiiy filmi uchun — “ShB” MChJ studiyasi

2. “Temurbeklar maktabi” badiiy filmi uchun — “Koʻzgu Film” MChJ studiyasi

3. “Shiroq” badiiy-publitsistik filmi uchun — “RAMZ-FILM” studiyasi

4. “Fayzulla Xoʻjaev” badiiy-publitsistik filmi uchun — “Oʻzbekfilm” DUK

5. “Usmon Nosir” badiiy-publitsistik filmi uchun — “Hope Film” MChJ studiyasi

6. “Pomir togʻlariday yuksak” badiiy-publitsistik filmi uchun — “Hujjatli va xronikal filmlar studiyasi” DUK

Shuningdek, quyidagi kinoloyihalar pitchingda yetarli ovoz to‘play olmaganligi sababli QAYTA PITCHING e’lon qilinadi:

1. “Erkin Vohidov” badiiy filmi

2. “Madaminbek” badiiy-publitsistik filmi

3. “Navoiyshunoslar jasorati” badiiy-publitsistik filmi

Eslatib o‘tamiz, O‘zbekiston Respublikasi Madaniyat vazirligi huzuridagi Kinematografiya agentligi tomonidan joriy yilning 30-aprelidan 30-mayiga qadar “Tirik tarix” dasturidan o‘rin olgan 15 ta loyiha bo‘yicha kinostudiyalar va kinokompaniyalar o‘rtasida tanlov e’lon qilingan.